Górniczym Szczęść Boże,witom sam wszyskich,ale szczególnie tych,co ich nasza ślonsko gwara niy sztyruje i im niy zawodzo,że sam tyż czasym po naszymu szkryflom.Ale co nojważniyjsze,lubiom sie tyż zdrowo pośmioć – jak jo! Czasym,ludkowie moi,to szlag by mie umioł trefić w tym naszym “przijaznym państwie” jak tak czytom i suchom, co te pierońske polityki z nami wyrobiajom,jakim to podłym kitym klajstrujom nom durś nasze ślypia i to we wszyskich usranych mediach! Ze podziwym i uznaniym patrza na ich “profesjonalno” robota i obłudne przi tym do obrziganio gymby.Dyć prawie kożdo dzisioj “reforma”,abo jako poprawka we ustawje,jak to sie tyż czasym nazywo – forsowano jes zaciekle yno ku korzyści szlachetnych lobbyistow i ściśle podug wskazowek bezinteresonych członkow Biznes-Klubu.Przodzi,za Komuny,to czowiek musioł sie tymu prziglondać i pomyjok przi tym trzimać,ale dzisioj…dzisioj podobno demokracyjo momy, choć… choć coroz ciynżi prziłazi mi w tyn pieroński bajer uwierzić!!!Jo sie dzisioj niy identyfikuja ze żodnom opcjom politycznom, bo niystety wszyskich jakoś ciongnie do cyntrum – tak lewica jak i prawica! Beztoż zmiyniajom te pajace partie i poglondy dużo gibci jak jo moje stare,wypowjałe galoty! Obrzidliwie lepki oportunizm sie we naszy polityce szerzi,kaj yno o porzondny plac przi tym obfitym i tustym korycie we Warszawie i Brukseli im idzie. O wszyskich cepiatych VIP-ach i aroganckich Prominyntach już niy spomna!
Kurt Tucholski roz pedzioł,że satyra niy zno żodnego tabu,a kej i jo tego zdanio jes,to tyż polecom gorko wszyskim omijać moj blog,co sie to ło bele gówno pieronym gibko obrażajom – ańfach srogim łukym!
Pyrsk!
